Məktəb icmaları üçün ilk onlayn müsabiqə

Məktəb icmaları üçün “Mənim ailəmin hekayəsindən” adlı yeni müsabiqə elan olunub. 27 yanvar – 20 fevral 2016-cı il tarixlərində www.community.az portalı tərəfindən onlayn formatda keçiriləcək müsabiqədə ümumi təhsil müəssisələrinin şagirdləri iştirak edə bilərlər

Məktəb icmaları üçün “Mənim ailəmin hekayəsindən” adlı yeni müsabiqə elan olunub. 27 yanvar – 20 fevral 2016-cı il tarixlərində www.community.az portalı tərəfindən onlayn formatda keçiriləcək müsabiqədə ümumi təhsil müəssisələrinin şagirdləri iştirak edə bilərlər. İştirakçılar ailələrinin ən maraqlı hekayələrini məktəb icmasının iştirakçıları ilə bölüşməklə portalın tərəfdaşlarından hədiyyə qazanmaq imkanı əldə edəcəklər.

Müsabiqənin şərtlərinə əsasən, hər bir iştirakçı 1000 sözdən çox olmayaraq öz ailə hekayəsini və ona uyğun şəkil, yaxud illüstrasiyanı www.community.az portalında “Mənim ailəmin hekayəsindən” müsabiqə qrupunda yerləşdirməlidirlər. Hekayə və şəkillər seçmək üçün valideynlər də kömək göstərə bilərlər.
Qaliblər iştirakçılar tərəfindən daha çox bəyənilməklə seçiləcək və tərəfdaşlar tərəfindən dəyərli hədiyyələr qazanacaqlar. Tərəfdaşlar arasında “Access Bank” ASC, “Azerfon” MMC, “Sağlam Ailə” MMC, “Standard Insurance” ASC kimi şirkətlər yer alıb.
Qeyd edək ki, Dünya Bankının maliyyə və “Allianz Consult” şirkətinin təşkilati dəstəyi ilə Təhsil Nazirliyinin həyata keçirdiyi pilot layihə çərçivəsində ölkənin 54 ümumi təhsil müəssisəsində məktəb icmaları yaradılıb.